Vandag se gelowiges is ongelukkig gewoond aan die Bybel in kitskosvorm en dit kom ons duur te staan. Ons ervaring is dat almal die Bybel inneem deur ander skrywers se boeke en reeds-verteerde dagstukkies. Die wat wel probeer Bybel lees wend hulleself na geïsoleerde versies sonder inagneming van die konteks. Niemand lees meer die Bybel van voor na agter vir hulleself nie. G’n wonder dat ons kerke vandag so oppervlakkig in ons geloof beleef word nie.

Dis presies wat die doel van En Route is: Om mense se lewens te verbind met die volle, lewende evangelie met al sy nuanse, sodat die verhaal so saamsmelt met ons eie dat dit één verhaal word!

Ons En Route Bybeltoere bly ’n hoogtepunt op Oosterlig se kalender. In 2024 het ons die voetspore van Paulus in Griekeland gevolg, en hierdie jaar neem die toer ons na ’n nuwe en opwindende bestemming—Italië.

Oosterlig se En Route Bybeltoer het hierdie keer koers gekies na die asemrowende Italië—’n reis reg in die voetspore van die apostel Paulus. Die groep is binnekort oppad na die historiese stad Rome, waar hul avontuur amptelik afskop.
Van die indrukwekkende Vatikaan tot ikoniese plekke waar Paulus die evangelie verkondig het, wag daar ’n reis vol betekenis, ontdekking en inspirasie op hulle.

Soos met elke toer, beleef deelnemers nie net die ongelooflike antieke plekke waarvan ons in die Bybel lees nie, maar ook die besondere gevoel van gemeenskap wat binne die groep groei.
Onder leiding van Roedolf Botha en Johan Erasmus vorm hierdie toere steeds die perfekte kombinasie van teologie en geskiedenis.

Hou gerus Oosterlig se kommunikasie dop vir meer inligting oor toekomstige Bybeltoere, en kliek op die video (regs) vir ’n voorsmakie van die hoogtepunte van ons En Route Bybeltoere. Ons wens die groep ’n voorspoedige reis toe—mag dit vir hulle ’n onvergeetlike ervaring wees.